Подвигот на Бунева

Како и минатата, така и оваа година, на денешната дата се потсеќаме на големиот подвиг кој го направила атентаторката Мара Бунева, на нејзиниот акт на саможртва против српски окупаторски режим во Македонија.

Мара Бунева е родена во 1902 год. во градот Тетово. Во 1927 ѝ е доделена задачата да се врати од Бугарија во Скопје и да стекне доверба кај српската власт со цел да не привлече никаков негативен впечаток. А уште истата година ВМРО го осудила на смрт поранешниот четник Велимир Прелиќ, голем противник на ВМРО кој убивал и измачувал на разни начини нејзни приврзаници, одговорен за затворањето и судењето на македонските студенти, дејци на Македонската Младинска Тајна Револуционерна Организација  (ММТРО). Овој процес е познат како Скопскиот студентски процес.

На 13 јануари 1928 год. стрела во началникот на српската полиција во Скопје, а воедно и правен советник на Скопското велико жупанство - Велимир Прелиќ во центарот на Скопје на стариот Камен мост на Вардар, кој починал по три дена. Потоа, таа самата се прострелува во градите и скока во водите на р. Вардар. Запрашана од српскиот офицер, кој прв пристигнал на местото на атентатот, зошто го убила Прелиќ, таа одговорила: „Заради мачењата кој тој ги изврши над моите браќа студенти. Затоа што си го сакам Отечеството.“ Таа умира наредниот ден од раните.